Увечары 1 верасня выйшлі на волю 4 палітвязні, асуджаныя за ўдзел у падзеях 19 снежня. Гэта Алесь Кіркевіч, Андрэй Пратасеня, Дзьмітрый Даронін і Алег Гнедчык.
Раней былі вызваленыя яшчэ дзевяць палітвязняў: Зміцер Дрозд, Арцём Грыбкоў, Сяргей Казакоў, Васіль Парфянкоў, Яўген Сакрэт, Віталь Мацукевіч, Уладзімір Яроменак, Аляксандр Квяткевіч.
Нагадаем, што эканоміка Беларусі перажывае складаныя часы: набыць валюту немагчыма, ля абменнікаў стаяць вялізныя чэргі, кошты на спажывецкія тавары растуць з кожным днём.
Экс-кандыдат у прэзідэнты Уладзімір Някляеў (на фота) мяркуе, што каб атрымаць крэдыты і выратаваць сітуацыю, што склалася ў эканоміцы Беларусі, Лукашэнку сапраўды давядзецца вызваляць палітвязняў і рабіць гэта як найхутчэй:
«Без гэтага немагчыма выйсці са становішча, у якім краіна апынулася па ягонай волі. Я перакананы, што крайні тэрмін вызвалення палітвязняў — кастрычнік, а можа нават паспрабуюць гэта зрабіць пад канец верасня. Бо Лукашэнка зацікаўлены, каб беларуская дэлегацыя, а лепш і ён сам, былі на саміце „Усходняга партнерства“, які прызначаны на канец верасня».
Палітвязень Павел Севярынец (на фота), які адбывае пакаранне у Пружанскім раёне, мяркуе, што вызваленне адбудзецца не раней за сярэдзіну кастрычніка — пасля народнага сходу, які прызначыла апазіцыя:
«Па логіцы падзеяў, калі абяцана да сярэдзіны кастрычніка вызваліць, то арыенцір — гэта масавыя пратэсты. Вось калі масавыя пратэсты прамінуць для Лукашэнкі, ён вызваліць, напэўна, і самых уплывовых, тых, чые імёны на слыху на Захадзе».
Ліцэнзій пазбаўленыя ўжо 7 адвакатаў
3
0 жніўня была пазбаўленая ліцэнзіі адвакат Тамара Сідарэнка (на фота). Гэтае рашэнне кваліфікацыйнай камісіі па пытаннях адвакацкай дзейнасці Міністэрства юстыцыі Рэспублікі Беларусь было зацверджанае на паседжанні калегіі Міністэрства юстыцыі.
17 жніўня 2011 года адвакат Т. Сідарэнка павінна была праходзіць пазачарговую атэстацыю разам з адвакатамі юрыдычнай кансультацыі Ленінскага раёна г. Мінска. Аднак, нягледзячы на гэта, не чакаючы вынікаў працы атэстацыйнай камісіі, кваліфікацыйная камісія Міністэрства юстыцыі прыняла рашэнне аб спыненні дзеяння яе ліцэнзіі.
У ходзе расследавання і разгляду ў судзе крымінальнай справы аб падзеях 19 снежня 2010 году Тамара Сідарэнка абараняла экс-кандыдата ў прэзідэнты Уладзіміра Някляева. Таксама, пасля пазбаўлення ліцэнзіі Міністэрствам юстыцыі адваката А. Агеева, яна абараняла і экс-кандыдата ў прэзідэнты Алеся Міхалевіча.
На стадыі папярэдняга расследавання адвакат неаднаразова заяўляла аб парушэнні правоў Уладзіміра Някляева як пры затрыманні, так і пры ўтрыманні пад вартай. Дамагалася ўстанаўлення асоб, якія ўдзельнічалі ў нападзе на Някляева 19 снежня 2010 года ў Мінску да пачатку мірнай акцыі, а таксама прыцягнення іх да адказнасці. У ходзе разгляду справы ў судзе адвакат заяўляла аб поўнай невінаватасці Някляева і прасіла суд апраўдаць яе падабароннага.
Нагадаем, што раней аналагічная працэдура пазбаўлення ліцэнзіі была ўжытая да іншых адвакатаў, якія працавалі па крымінальнай справе аб падзеях 19 сьнежня 2011 года.
Так былі пазбаўленыя ліцэнзіі адвакаты У. Тоўсцік і Т. Гараева, якія баранілі І. Халіп, адвакат А. Агееў, які бараніў А. Міхалевіча, яго жонка адвакат З. Залеўская, адвакат Т. Агеева, таксама ўдзельнічала ў вытворчасці следчых дзеянняў па дадзенай крымінальнай справе .
Адвакат П. Сапелка, які бараніў А. Саннікава быў выключаны са складу Мінскай гарадской калегіі адвакатаў па прадстаўленні Міністэрства юстыцыі Рэспублікі Беларусь.
Трое з гэтых адвакатаў (П. Сапелка, Т. Агеева, А. Агееў) з’яўляліся членамі Прэзідыума Мінскай гарадской калегіі адвакатаў – органа адвакацкага самакіравання.
Таксама раней у ходзе разгляду на пасяджэннях пазачарговых атэстацыйных камісій не былі атэставаны адвакаты, якія ўдзельнічаюць па справе аб падзеях 19 сьнежня 2010 года, Д. Ліпкіна, якая бараніла М. Ліхавіда, А. Бахціна, якая бараніла І. Халіп, а таксама А. Бурак, бараніла А. Класкоўскага і А. Лябедзьку. Пазіцыя дадзеных адвакатаў зводзілася да поўнага апраўдання іх падабаронных. Разам з тым рашэнне кваліфікацыйнай камісіі па пытаннях адвакацкай дзейнасці аб пазбаўленні іх ліцэнзіі па іх не прымалася.
Такім чынам, колькасць адвакатаў, якія пазбаўленыя магчымасці ажыццяўляць прафесійную дзейнасць па ініцыятыве Міністэрства юстыцыі Рэспублікі Беларусь і былі звязаны тым ці іншым чынам з крымінальнай справай аб падзеях 19 снежня, дасягнула 7 чалавек.
Артыкулы па тэме
"Няправільных" беларускіх адвакатаў пазбаўляюць ліцэнзій
Міжнародная супольнасць цісне на рэжым Беларусі новымі санкцыямі
