Беларускія праваабаронцы патрабуюць спыніць пераслед Дзмітрыя Казлова

Праваабарончыя і іншыя арганізацыі грамадзянскай супольнасці Беларусі зрабілі адкрытую заяву.

Мінск, 21 студзеня 2020 г.

16 студзеня 2020 году Дзмітрый Казлоў, вядомы як блогер Шэры кот, у чарговы раз быў асуджаны судом Оршы на 15 сутак адміністрацыйнага арышту.

На Дзмітрыя Казлова агулам склалі восем пратаколаў па арт. 23.34 КаАП (за ўдзел у акцыях і за распаўсюд заклікаў да ўдзелу ў іх), і яго чакае яшчэ адзін судовы працэс 27 студзеня ў судзе Ленінскага раёну Мінска.

Пазбаўленне волі Дзмітрыя Казлова па працягласці суадноснае з пакараннем у выглядзе арышту паводле Крымінальнага Кодэксу Рэспублікі Беларусь.

Яшчэ 25 снежня 2019 году Дзмітрый Казлоў трапіў у ІЧУ Оршы на 15 сутак арышту за ўдзел у мірных сходах, якія адбываліся ў Мінску падчас парламенцкіх выбараў.

9 студзеня 2020 году на волю ён так і не выйшаў, бо ў той самы дзень суд Оршы і Аршанскага раёну пастанавіў пакараць яго наступным, другім запар 15-суткавым арыштам, гэтым разам за ўдзел у мінскіх акцыях супраць “паглыбленай інтэграцыі” 21 снежня 2019 году.

На наступны дзень, 10 студзеня 2020 году, яго зноў судзілі, цяпер за ўдзел у мінскіх пратэстах 20 снежня 2019 году. Пастанова суду – трэці арышт на 15 сутак.

13 студзеня 2020 году судовы канвеер працягваўся, і Дзмітрый Казлоў быў асуджаны на 15 сутак ужо чацвёрты раз – за заклікі ў сацыяльных сетках на сход у Мінску 29 снежня 2019 году.

20 студзеня блогер быў часова вызвалены з ІЧУ Оршы на час правядзення “дэзынфекцыі”. Ён паведаміў журналістам, што агулам быў асуджаны да 90 сутак адміністрацыйнага арышту.

Тактыка асуджэння грамадскіх актывістаў адразу на некалькі адміністрацыйных арыштаў запар і раней выкарыстоўвалася беларускімі ўладамі ў мэтах палітычна матыванага ціску. Так, актывіст Іван Амельчанка ў 2012 годзе адбываў 52 сутак адміністрацыйнага арышту ў ЦІП  Мінска запар.

Мы ў чарговы раз адзначаем, што такога кшталту практыка прымянення нормаў КаАП з’яўляецца заганнай, мае палітычна матываваны характар, ужываецца з мэтай аказання ціску і пакарання за грамадскую дзейнасць блогера Дзмітрыя Казлова.

Акрамя таго, мы адзначаем, што пазбаўленне волі Дзмітрыя Казлова па працягласці суадноснае з пакараннем у выглядзе арышту паводле Крымінальнага Кодэксу Рэспублікі Беларусь.

Зняволенне Дзмітрыя Казлова выкарыстана выключна ў сувязі з рэалізацыяй ім свабоды мірных сходаў, выказвання меркаванняў і распаўсюду інфармацыі, гарантаваных як Канстытуцыяй Рэспублікі Беларусь, так і міжнароднымі нормамі ў галіне правоў чалавека – Міжнародным Пактам аб грамадзянскіх і палітычных правах, у прыватнасці.

Нагадваем, што згодна з п. 3.1 Кіраўніцтва па вызначэнні паняцця “палітычны зняволены”, зацверджаным беларускай праваабарончай супольнасцю на ІІІ Праваабарончым форуме, пазбаўленне волі (у тым ліку і адміністрацыйны арышт) у сувязі з негвалтоўным ажыцяўленнем свабодаў, гарантаваных міжнароднымі нормамі права ў галіне правоў чалавека, з’яўляецца падставай для прызнання такой асобы палітычным зняволеным з патрабаваннем неакладнага вызвалення. Гэтыя патрабаванні ў поўнай меры датычацца ўсіх адміністрацыйна арыштаваных за удзел, арганізацыю мірных сходаў і заклікі да іх правядзення, пра што намі ўжо неаднаразова заяўлялася.

У сувязі з гэтым, мы, прадстаўнікі беларускіх праваабарончых арганізацый, выказваем пратэст палітычнаму пераследу і арышту блогера Дзмітрыя Казлова і патрабуем:

  • адмены вынесеных Дзмітрыю Казлову пастановаў суда Маскоўскага раёна г. Мінска ад 25 снежня 2019 г., а таксама суда г. Оршы і Аршанскага раёна ад  9, 10 і 13 студзеня 2020 г. і іншых судовы пастановаў, вынесеных у дачыненні да яго па арт. 23.34 КаАП;
  • спынення раней распачатых супраць Дзмітрыя Казлова адміністрацыйных працэсаў па арт. 23.34 КаАП;

Праваабрончы цэнтр “Вясна”;

ГА “Беларуская асацыяцыя журналістаў”;

ПУ “Беларускі дакументацыйны цэнтр”;

РПГА “Беларускі Хельсінкскі камітэт”;

РГА “Прававая ініцыятыва”;

Установа «Кансультацыйны цэнтр па актуальных міжнародных практык і іх імплементацыі ў праве “Х’юман Канстанта”»;

Беларускі Дом правоў чалавека імя Барыса Звозскава;

Цэнтр прававой трансфармацыі “Lawtrend”;

Простае таварыства “Ініцыятыва Forb”;

ППУ “Офіс па правах людзей з інваліднасцю”;

Беларускі ПЭН-цэнтр.

Крыніца

Latest

April 3, 2020

Concerns about responses by state authorities to the global COVID-19 crisis

The network of Human Rights Houses is concerned by recent actions on the part of state authorities across western and eastern Europe, the western Balkans, and the Caucasus in response to the escalating COVID-19 crisis. These actions, taken to combat the rising number of infections and deaths associated with COVID-19, raise questions about states’ commitments to civic freedoms and human rights.

April 1, 2020

Azerbaijani authorities must not continue to use COVID-19 pandemic to further crackdown on civil society

Human Rights House Foundation (HRHF) remains very concerned with a number of recent actions taken by the Azerbaijani authorities in response to the global COVID-19 pandemic.

March 27, 2020

«Свобода выражения мнений является фундаментальным правом каждого человека». Выступление адвоката Людмилы Казак

Беларусский дом прав человека публикует выступление в апелляционной инстанции Людмилы Казак, адвоката Ивана Комара, признанного политзаключенным.