Фундацыя дамоў правоў чалавека

Belarusian

Карцінка: 2_urny 
Правы належаць: naviny.by

Напярэдадні парламенцкіх выбараў назіральнікі прапануюць стварыць беларускамоўную версію сайта ЦВК

Зварот ад імя “Праваабаронцаў за свабодныя выбары” адзін з каардынатараў кампаніі даслаў старшыні ЦВК Лідзіі Ярмошынай 6 ліпеня. Гэты антыдыскрымінацыйны крок асабліва важны, паколькі суб’екты выбарчага працэсу актыўна карыстаюцца беларускай мовай, лічыць аўтар звароту Валянцін Стэфановіч.

панядзелак, 25 ліпеня 2016, Беларускі ДПЧ, паводле spring96.org

11 верасня ў Беларусі пройдуць парламенцкія выбары, таму пытанне аб беларускамоўнай версіі сайта з'яўляецца вельмі актуальным на дадзены момант. Выкладаючы сваю прапанову, Валянцін Стэфановіч адзначае наяўнасць на сайце Цэнтральнай камісіі версіі для асобаў з кепскім зрокам, што робіць сайт даступным для ўсіх грамадзянаў краіны, у тым ліку і з фізічнымі асаблівасцямі.

Па сутнасці свайго звароту, праваабаронца нагадвае чыноўніцы, што ў Беларусі дзве дзяржаўныя мовы, і выказвае засмучэнне, што сайт Цэнтральнай камісіі функцыянуе толькі на адной з іх – рускай.

“Адсутнасць беларускамоўнай версіі сайта, паводле нашага глыбокага пераканання, не спрыяе на практыцы ажыццяўленню ў поўнай меры прынцыпа роўнасці дзвюх дзяржаўных моваў, замацаванага ў Артыкуле 17 Канстытуцыі Рэспублікі Беларусі”, - адзначаецца ў звароце.

Таксама ён прыводзіць артыкул 2 Закона “Аб мовах у Рэспубліцы Беларусь” ад 26 студзеня 1990 года, паводле якога беларуская дзяржава забяспечвае ўсебаковае развіццё і функцыянаванне беларускай і рускай моваў ва ўсіх сферах грамадскага жыцця, а грамадзянам гарантуе права карыстацца нацыянальнай мовай і абіраць мову зносінаў.

“Наяўнасць беларускамоўнай версіі сайта на практыцы спрыяла б большаму ўжыванню беларускай мовы ў такой важнай сферы грамадскага і палітычнага жыцця краіны як выбары”, - гаворыцца ў звароце.

Падкрэсліваючы важнасць беларускамоўнай версіі сайта ЦВК, незалежныя назіральнікі апелююць да таго факта, што некаторыя суб’екты выбарчага працэсу актыўна карыстаюцца беларускай мовай у перыяд правядзення выбарчых кампаній.

***

Кампанія "Праваабаронцы за свабодныя выбары" з'яўляецца незалежнай і не ставіць мэтай падтрымку палітычных партый і якіх-небудзь палітычных дзеячоў. Увесь выбарчы працэс назіральнікі ацэньваюць выключна зыходзячы з прынцыпаў свабодных, дэмакратычных і празрыстых выбараў, пры якіх народ Беларусі можа ў поўнай меры рэалізаваць сваё канстытуцыйнае права на ўдзел у кіраванні сваёй краінай.

Беларускі ДПЧ, паводле spring96.org

Перамяшчэнне па старонцы